D Arnialp liit am dunkelblaawä Arnisee uf rund 1400 Meter uber Meer; hinnädra isch dr Sunnig Grat. Vu Intschi und vu Amschtäg üs gaht ä Säilbahn uf ds Arni.
Mit em prächtigä Arnisee liit diä Alp zmittst imänä Erholigsgebiät innä. Vu da üs cha mä ä Hüüfä scheeni Wanderigä machä.
Produziärt wärdet hiä diä sogenanntä Arnimutschli. Drnäbt git äs zumänä groossä Täil äü Nitlä, Ankä und Jogurt fir d Feriägescht uf em Arni.
«Friäner häiget i dä Hiiserä und i dä Schtäll uf Arni ä Hüüfä Ughiir ghüüset. So sig äs eppädiä vorcho, dass ä sogenanntä Milchschelm d Schtäll zum Ubernachtä prüücht häig und moorädes wider verschwundä sig.»
Ürner Sagäwält